جاپان کے جنوبی حصے میں واقع ایک فوجی تربیتی مقام پر جاری مشق کے دوران ایک افسوسناک حادثہ پیش آیا، جہاں ٹینک کے اندر گولہ پھٹنے سے 3 فوجی جان کی بازی ہار گئے جبکہ ایک اہلکار شدید زخمی ہو گیا۔
بین الاقوامی خبر رساں اداروں کے مطابق یہ حادثہ اوئیتا صوبے کے ہیجودائی تربیتی میدان میں پیش آیا، جہاں دیگر بکتر بند گاڑیوں کے ہمراہ براہِ راست فائرنگ کی مشق جاری تھی، دھماکا اس وقت ہوا جب ایک جدید ٹینک کے اندر عملہ اپنی ذمہ داریاں انجام دے رہا تھا۔
غیر ملکی ذرائع ابلاغ کی رپورٹس کے مطابق ٹینک کے گن ٹرٹ کے اندر موجود کمانڈر، نشانہ باز اور حفاظتی ذمہ دار موقع پر ہی ہلاک ہو گئے جبکہ ڈرائیور، جو ٹینک کے اندر ہی موجود تھا، شدید زخمی حالت میں اسپتال منتقل کیا گیا۔ زخمی اہلکار کی حالت تشویشناک بتائی جا رہی ہے۔
عالمی میڈیا رپورٹس کے مطابق جاپان کی زمینی دفاعی افواج کے سربراہ ماسایوشی آرائی نے واقعے پر گہرے دکھ اور افسوس کا اظہار کرتے ہوئے اعلان کیا ہے کہ حادثے کی مکمل تحقیقات تک جدید ٹینکوں کے ساتھ براہِ راست فائرنگ کی تمام مشقیں عارضی طور پر روک دی گئی ہیں۔ ان ٹینکوں میں ایک ہی نوعیت کا اسلحہ استعمال ہوتا ہے، اس لیے احتیاطی اقدامات ناگزیر ہیں۔
یہ امر قابلِ ذکر ہے کہ مذکورہ ٹینک جاپان کی جدید ترین عسکری ٹیکنالوجی کا حصہ ہے، جسے پہلی بار 2011 میں فوج میں شامل کیا گیا تھا، اور اسے جدید دفاعی نظام میں کلیدی حیثیت حاصل ہے۔
