شوپیاں/ضلع شوپیاں میں پولیس نے منشیات کے خلاف کارروائی کرتے ہوئے الگ الگ واقعات میں دو افراد کو گرفتار کر کے مبینہ طور پر ہیروئن اور چرس نما منشیات برآمد کرنے کا دعویٰ کیا ہے۔
پولیس کے مطابق امام صاحب پولیس اسٹیشن کی ٹیم نے کیلورہ کراسنگ پر ناکہ چیکنگ کے دوران ایک شخص کو مشتبہ حرکات کی بنیاد پر روکا۔ تلاشی کے دوران اس کے قبضے سے تقریباً 1.210 گرام ہیروئن نما مادہ برآمد ہوا۔گرفتار شخص کی شناخت مرشد احمد ملک ساکن کراوورہ، امام صاحب کے طور پر ہوئی ہے۔ پولیس نے اس سلسلے میں پولیس اسٹیشن امام صاحب میں ایف آئی آر نمبر 64/2026درج کرکے این ڈی پی ایس ایکٹ کی متعلقہ دفعات کے تحت تحقیقات شروع کردی ہیں۔
ایک دوسرے واقعے میں پولیس اسٹیشن زینہ پورہ کی ٹیم نے باباپورہ زینہ پورہ کراسنگ پر ناکہ چیکنگ کے دوران ایک شخص کو روکا۔ تلاشی کے دوران اس کے قبضے سے تقریباً 18 گرام چرس نما مادہ برآمد ہونے کا دعویٰ کیا گیا۔گرفتار شخص کی شناخت منیب احمد ٹھوکر ولد مرحوم شمیم احمد ٹھوکر، ساکن بہی باغ، یاری پورہ، کولگام کے طور پر ہوئی ہے۔ پولیس نے اس معاملے میں پولیس اسٹیشن زینہ پورہ میں ایف آئی آر نمبر 120/2026درج کرکے قانونی کارروائی شروع کردی ہے۔
پولیس کے مطابق دونوں معاملات کی الگ الگ تحقیقات جاری ہیں تاکہ مبینہ منشیات کے ذرائع کا پتہ لگانے کے ساتھ ساتھ ممکنہ روابط بھی سامنے لائے جا سکیں۔ برآمد شدہ اشیاء کو قانونی اور فرانزک کارروائی مکمل ہونے تک ہیروئن نما اور چرس نما مادےکے طور پر بیان کیا گیا ہے۔
