لیہہ/وزیر اعظم نریندر مودی 15 اکتوبر کو مرکز کے زیر انتظام علاقے لداخ میں کئی اہم بنیادی ڈھانچے کے منصوبوں کا ورچوئل افتتاح کریں گے۔ ان منصوبوں میں لیہہ ہوائی اڈے کی توسیع شدہ ٹرمینل عمارت کے علاوہ اہم سڑکیں اور پل بھی شامل ہیں۔ اس سلسلے میں لداخ کے تمام سات اضلاع میں افتتاحی تقریبات منعقد کی جائیں گی۔
حکام کے حوالے سے موصولہ اطلاعات کے مطابق افتتاحی تقریب صبح 11 بجے منعقد ہوگی، جس کے دوران وزیر اعظم نریندر مودی نئی دہلی سے ویڈیو کانفرنسنگ کے ذریعے منصوبوں کا افتتاح کرنے کے بعد اجتماع سے خطاب بھی کریں گے۔ لیفٹیننٹ گورنر سکسینہ سمیت دیگر اعلیٰ حکام اور معزز شخصیات لیہہ میں منعقد ہونے والی مرکزی تقریب میں شرکت کریں گے۔
افتتاح کیے جانے والے اہم منصوبوں میں لیہہ کے کشوک باکولا رنپوچے ہوائی اڈے کی نئی ٹرمینل عمارت شامل ہے۔ اس منصوبے پر 600 کروڑ روپے سے زائد لاگت آنے کا تخمینہ ہے۔ تقریباً 23 ہزار مربع میٹر رقبے پر پھیلی یہ تین منزلہ عمارت سالانہ 35 لاکھ مسافروں کو سنبھالنے کی صلاحیت کے مطابق تیار کی گئی ہے۔
ٹرمینل کی توسیع سے ہوائی اڈے پر مسافروں کو سنبھالنے کی صلاحیت میں نمایاں اضافہ ہونے اور لداخ کے فضائی رابطے کو مزید بہتر بنانے کی توقع ہے۔ اس سے بالخصوص سیاحوں کی زیادہ آمد کے دوران مسافروں کو سہولیات فراہم کرنے میں مدد ملے گی۔
ہوائی اڈے کی ٹرمینل عمارت کے علاوہ کئی اہم سڑکوں اور پلوں کے منصوبوں کا بھی افتتاح متوقع ہے۔ ان منصوبوں کا مقصد لداخ کے مختلف علاقوں، بالخصوص دور دراز اور سرحدی علاقوں میں رابطے کو بہتر بنانا ہے۔ اس کے ساتھ ساتھ ان سڑکوں اور پلوں سے عام شہریوں کی آمدورفت اور اسٹریٹجک ضروریات کے لیے رابطے کو مضبوط بنانے میں بھی مدد ملے گی۔
لداخ کے تمام سات اضلاع میں افتتاحی تقریبات منعقد کرنے کا منصوبہ ہے، جن میں متعلقہ اضلاع کے ڈپٹی کمشنروں، پولیس افسران، سماجی و مذہبی رہنماؤں اور دیگر معزز شخصیات کی شرکت متوقع ہے۔
