حیدرآباد،قاسم آباد سے گم ہونے والے لڑکے کے ورثا کا عدم بازیابی پر احتجاج

حیدرآباد(اسٹاف رپورٹر)قاسم آباد سے ایک ہفتے قبل گم کیے گئے ڈگری کالج کے طالب علم مہران میرانی کی بازیابی کیلیے ورثا اور دوستوں نے حیدرآبا دپریس کلب کے سامنے مظاہرہ اورنعرے بازی کی۔ اس موقع پر مہران میرانی کے رشتے دار شاہ جہاں میرانی ، نور احمد اورعزیز شاہ اور دیگر کا کہنا تھا کہ 13 جنوری کی شام کو انٹر کے طالب علم مہران میرانی کو وحدت کالونی میں جاتے ہوئے راستے میں سفید کپڑوں میں ملبوس اہلکاروں نے اپنی موٹر سائیکل پر بٹھایا اور اسے نامعلوم مقام پر لے گئے جس کو ہم نے مختلف جگہوں پر تلاش کیا لیکن اس کا کچھ پتا نہیں چل رہا ہے۔ اس واقعے کی رپورٹ قاسم آباد تھانے میں بھی داخل کرائی گئی ہے لیکن پولیس آج تک اسے بازیاب نہیں کراسکی ہے۔ انہوںنے اپیل کی کہ اس صورتحال کا نوٹس لے کر مہران میرانی کو بازیاب کرایا جائے اور ہمیں انصاف فراہم کیا جائے۔