اسلام آباد: پنجاب پولیس نے خواتین کو تحفظ فراہم کرنے کے لیے ’ویمن تحفظ ایپ‘ لانچ کردی، خواتین کسی بھی مشکل صورتحال میں بغیر کال کیے خاموشی سے میسج کے ذریعے پولیس سے رابطہ کرسکیں گی۔
ایکسپریس نیوز کے مطابق پنجاب پولیس کے سینئر افسر کا اس بارے میں کہنا ہے کہ ’ویمن تحفظ ایپ‘ کا مقصد خواتین کی حفاظت کو یقینی بنانا ہے۔ انہوں نے کہا کہ اسمارٹ فون استعمال کرنے والی خواتین اس ایپ کو ڈاؤن لوڈ کریں تاکہ کسی بھی مشکل صورت حال میں ایپ کے ذریعے پولیس سے رابطہ کرسکیں۔
اس ایپلی کیشن کے بارے میں ان کا کہنا تھا کہ مدد کا پیغام موصول ہوتے ہی پولیس بغیر فون کال کیے متاثرہ خاتون سے رابطے میں آجائے گی اور شکایت کی صورت میں پولیس اسپیشل اسکواڈ فوری طور پر خاتون کی مدد کو پہنچ جائے گا۔
پولیس کا کہنا تھا کہ ’ویمن تحفظ ایپ‘ کو پنجاب کے تمام اضلاع میں لانچ کردیا گیا ہے اور اس ایپ کے ذریعے پولیس سے رابطہ کرنے والی خواتین پنجاب سیف سٹیزن پورٹل کے تحت مدد حاصل کرسکیں گی۔
