مغربی افریقی ملک مالی کی ہمسایہ ریاستوں نے اس ملک کے خلاف سخت پابندیاں عائد کرنے کا فیصلہ کیا ہے۔
قبل ازیں، مالی کی فوجی حکومت نے فروری میں طے شدہ انتخابات ملتوی کرنے کا اعلان کر دیا تھا۔
گھانا کے دارالحکومت میں افریقی اقتصادی اتحاد ایکوواس نے تجارتی پابندیوں کے ساتھ ساتھ مالی سے ملحق تمام سرحدیں بھی بند کرنے کا اعلان کیا ہے۔
اس کے علاوہ بماکو حکومت کی امداد میں کمی اور مغربی افریقی ممالک کے مرکزی بینک میں مالی کے اثاثوں کو منجمد کرنے کی دھمکی بھی دی گئی ہے۔
دوسری جانب بماکو میں حکام نے کہا ہے کہ ملک میں سلامتی کی خراب صورتحال کے باعث وہ مزید چار سال تک انتخابات نہیں کروائیں گے۔
