لاہور (نمائندہ جسارت) مسلم لیگ (ن) کی نائب صدر مریم نواز نے کہا ہے کہ عمران خان ہر روز کہتے ہیں کہ ان کے پاس پتے ہیں‘ سرپرائز دیں گے‘ میں کہتی ہوں کہ ان کے سارے پتے بکھر چکے‘ اب ان کے صرف ایک ہی پتا ہے وہ ہے ٹرمپ کارڈ، ان کا ٹرمپ کارڈ یہ ہے کہ وہ سیاست سے دست بردار ہو جائیں اور گھر جائیں‘ پاکستان کا جہاز کسی بھی وقت پرانے پاکستان میں لینڈ کرنے والا ہے۔ لاہور میں مسلم لیگ (ن) کے کارکنوں سے خطاب کرتے ہوئے مریم نواز کا کہنا تھا کہ عمران خان تحریک عدم اعتماد پر ووٹنگ میں تاخیری حربے استعمال کرکے ایک ایک سے اقتدار کی بھیک مانگ رہے ہیں۔ مریم نواز نے سماجی رابطے کی ویب سائٹ پر ٹوئٹ میں لکھا کہ سب اسکینڈلز کا باپ ہے یہ اسکینڈل جس کے تانے بانے بنی گالہ سے ملتے ہیں‘ صرف پوسٹنگ ٹرانسفرز کے لیے لی گئی رشوت میں 6 ارب سے زیادہ کمایا ہے‘ آئندہ دنوں میں ہوش اڑا دینے والے ثبوت سامنے آئیں گے۔
