لاہور (صباح نیوز) پنجاب اسمبلی میں پیپلز پارٹی کے پارلیمانی لیڈر سید حسن مرتضیٰ نے کہا ہے کہ نام نہاد گورنر، پنجاب کے عوام پر اپنا فیصلہ مسلط نہیں کر سکتا، فسادی اور انتشاری ٹولا ملک میں فساد برپا کرنا چاہتا ہے، گورنر پنجاب میں اگر تھوڑی سی بھی شرم و حیا ہے تو مستعفی ہوں، صدر ہو یا گورنر آئین پر عمل کے پابند ہیں۔ ان خیالات کا اظہار انہوں نے ایک ٹوئٹ پر کیا۔ حسن مرتضیٰ کا کہنا تھا کہ پاکستان کا بڑا صوبہ پنجاب میں سیاسی عدم استحکام عوام کے مفاد میں نہیں۔ صدر مملکت، وزیراعظم کے مشورے کے پابند ہیں براہِ راست کوئی کام نہیں کر سکتے، تحریک انصاف مفاداتی چپقلش کی خاطر ملک کو فسطائیت کی راہ پر ڈالنا چاہتی ہے۔ ان کا مزید کہنا تھا کہ ایوان کا تقدس پامال کرنے پر تحریک انصاف کے ارکان اسمبلی کا کڑا مواخذہ ہونا چاہیے۔
