اسلام آباد: وزیراعظم شہباز شریف نے گورنر پنجاب کو ہٹانے کی سمری ایک بار پھر صدر مملکت کو ارسال کردی۔
تفصیلات کے مطابق وزیراعظم شہباز شریف نے گورنر پنجاب عمر سرفراز چیمہ کو ہٹانے کی سمری دوبارہ صدر مملکت عارف علوی کو بھجوادی ہے۔
وزیراعظم کی جانب سے بھیجی گئی سمری پر عمل نہ ہوا تو قانون کے مطابق 10 روز کے بعد گورنر پنجاب خود ہی برطرف ہوجائیں گے جس کے بعد وزیراعظم شہباز شریف ساتھ ہی نئے گورنر کی تقرری کی ایڈوائس بھی صدر کو بھیج دیں گے۔
واضح رہے کہ صدرمملکت عارف علوی نے سابق گورنر چودھری سرور کی برطرفی کے احکامات صبح 4 بجے جاری کر دیئے تھے،
خیال رہے وزیراعظم شہباز شریف نے پہلے بھی ایک سمری صدر مملکت کو بھجوائی تھی اور اس سمری کو 14 دن مکمل ہوچکے ہیں تاہم صدر مملکت نے اس سمری پر کوئی آرڈر جاری نہیں کیا جس کے بعد وزیراعظم نے ایک بار پھر گورنر پنجاب عمر چیمہ کو ہٹانے کی اپنی ایڈوائس صدرمملکت کو بھجوا دی ہے۔
