اسلام آباد : غزہ بچاؤمہم کی قیادت کے وفاقی وزیر داخلہ محسن نقوی سے مذاکرات کامیاب،41روز سے جاری غزہ بچاؤ دھرنا ختم کرنے کا اعلان کردیا گیا۔
وزارت داخلہ سے جاری بیان کے مطابق ہفتہ کو اسلام آباد میں غزہ بچاؤمہم کے سرپرست سابق سینیٹر مشتاق احمد خان کی سربراہی میں سیو غزہ کمپین کے عہدیداروں نے وزیر داخلہ محسن نقوی سے ملاقات کی۔
وزیرداخلہ نے کہا کہ فلسطین کیلئے ہر پاکستانی کے دل میں وہی بات ہے جو آپ کے دل میں ہے،ہمیں ان کے کسی مطالبے پر اعتراض نہ ہے،پاکستان اس ضمن میں پہلے ہی بھر پور کردار ادا کر رہا ہے،ہم ان کی سفارشات پر بھی عملدرآمد کریں گے۔
محسن نقوی کا کہنا تھا کہ دھرنے کے دوران ایک ناخوشگوار واقعہ میں جانبحق ہونے والے شرکا کیلئے دعا گو ہیں،جاںبحق ہونے والے افراد کو انصاف ضرور ملے گا۔ سیکرٹری داخلہ خرم علی آغا، چیف کمشنر اسلام آباد محمد علی رندھاوا، ڈپٹی کمشنر اسلام آباد عرفان نواز میمن اور ڈی آئی جی آپریشنر علی رضا نے بھی ملاقات میں شرکت کی ۔
میڈیا ذرائع کے مطابق سابق سینیٹرمشتاق احمد خان نے کہا کہ حکومت سے ہمارا معاہدہ ہوگیا ہے، ہمارے مطالبات تسلیم کرلئے گئے ہیں اور ہم دھرنا ختم کررہے ہیں۔
