انقرہ (انٹرنیشنل ڈیسک) ترکیہ میں شامی پناہ گزینوں کے خلاف پرتشدد واقعات کے بعد 470 سے زائد افراد کو حراست میں لیا گیا۔ پرتشدد واقعات اس وقت شروع ہوئے جب ترک پولیس نے ایک شامی شخص کو 7 سالہ شامی بچی سے زیادتی کے الزام میں گرفتار کیا۔ شام مخالف فسادات سب سے پہلے صوبہ قیصری میں شروع ہوئے،جہاں کے مکینوں نے اتوار کے روزشامی پناہ گزینوں کے گھروں اور کاروباری مراکز کو آگ لگا دی اور گاڑیوں کی توڑ پھوڑ کی۔ اس کے بعد پر تشدد واقعات دیگر صوبوں میں پھیل گئے۔ شامیوں کے ساتھ اظہار یکجہتی کے لیے شام کے شمال مغربی علاقوں میں انتقامی فسادات نے جنم لیا، جو ترکیہ کی حمایت یافتہ فورسز کے زیر کنٹرول ہیں۔ اس دوران مظاہرین نے ترکیہ کے جھنڈے پھاڑے اور ٹرکوں پر پتھراؤ کیا۔ ترک محافظوں کے ساتھ جھڑپوں میں 4 افراد ہلاک ہوگئے۔
