چینی صدر شی جن پنگ نے کہا ہے کہ چین اور تائیوان کے ایک ہونے کے عمل کو کوئی طاقت نہیں روک سکتی، کیونکہ آبنائے تائیوان کے دونوں جانب رہنے والے چینی عوام کے درمیان خون اور رشتہ داری کا گہرا تعلق ہے۔
نئے سال کے موقع پر اپنے خطاب میں شی جن پنگ نے کہا کہ تائیوان کا چین کے ساتھ دوبارہ الحاق ایک ناگزیر حقیقت ہے اور اسے روکا نہیں جا سکتا۔
چینی صدر کا یہ بیان تائیوان کے قریب چین کی دو روزہ فوجی مشقوں کے اختتام کے ایک دن بعد سامنے آیا ہے۔ یہ مشقیں امریکا کی جانب سے تائیوان کو 11 ارب ڈالر سے زائد مالیت کے ریکارڈ اسلحہ فروخت کرنے کی منظوری کے چند روز بعد کی گئی تھیں۔
اپنے نئے سال کے پیغام میں شی جن پنگ نے کہا کہ آبنائے تائیوان کے دونوں اطراف بسنے والے چینی عوام کے درمیان خونی رشتہ اور قرابت داری موجود ہے، اور مادرِ وطن کا دوبارہ ملاپ وقت کی ضرورت ہے جسے روکا نہیں جا سکتا۔
انہوں نے مزید کہا کہ چین ہمیشہ تاریخ کی درست سمت میں کھڑا رہا ہے اور عالمی امن و ترقی کے فروغ کے لیے دیگر ممالک کے ساتھ مل کر انسانیت کے مشترکہ مستقبل کی تعمیر کے لیے کام کرنے کو تیار ہے۔
