سری نگر/جموں و کشمیر قانون ساز اسمبلی نے پیر کے روز ایک دیرینہ روایت سے ہٹ کر سابق ارکان اسمبلی کے انتقال پر تعزیتی حوالہ جات پیش کرنے کے فوراً بعد سرکاری و قانون سازی کا کاروبار جاری رکھا۔اسپیکر عبدالرحیم راتھر نے سابق ارکان اسمبلی شیخ مصطفیٰ کمال، دھرم پال اور غلام حسن کے انتقال پر تعزیتی حوالہ جات پڑھ کر سنائے، جس کے بعد ایوان کی کارروائی معمول کے مطابق آگے بڑھائی گئی۔
تعزیتی حوالہ جات کے دوران اسپیکر نے تینوں مرحوم ارکان کے نام اور ان سے متعلق تعزیتی کلمات ایوان کے سامنے رکھے، تاہم کسی دوسرے رکن نے اس موقع پر اظہارِ تعزیت میں حصہ نہیں لیا۔ بعد ازاں ایوان میں مرحوم ارکان کی یاد میں دو منٹ کی خاموشی اختیار کی گئی۔
ماضی میں مختلف سیاسی جماعتوں سے تعلق رکھنے والے ارکان تعزیتی کارروائی میں حصہ لیتے اور مرحوم ارکان کی خدمات کو یاد کرتے تھے۔ روایتی طور پر تعزیتی حوالہ جات پیش کیے جانے کے بعد ایوان کی کارروائی دن بھر کے لیے ملتوی کردی جاتی تھی اور کوئی سرکاری یا قانون سازی کا کاروبار نہیں ہوتا تھا۔
گزشتہ خزاں کے اجلاس کے دوران وزیر اعلیٰ عمر عبداللہ نے اسمبلی میں تعزیتی حوالہ جات کے طریقہ کار میں تبدیلی کی تجویز پیش کی تھی۔ ان کا کہنا تھا کہ جب وہ پارلیمنٹ میں تھے تو تعزیتی حوالہ جات کے بعد طویل تقاریر ہوتی تھیں اور اس عمل میں پورا دن صرف ہوجاتا تھا۔عمر عبداللہ نے تجویز دی تھی کہ اسپیکر صرف تعزیتی حوالہ جات پڑھیں اور ارکان ایک منٹ خاموشی اختیار کریں، جیسا کہ پارلیمنٹ میں بعد میں طریقہ کار اختیار کیا گیا تھا۔
