نئی دہلی: دہلی پولیس نے نارائنا انڈسٹریل ایریا میں چلنے والے ایک فرضی ایپل/آئی او ایس ٹیکنیکل سپورٹ کال سینٹر کا پردہ فاش کرتے ہوئے 7 افراد کو گرفتار کیا ہے۔ پولیس کے مطابق یہ گروہ دھوکہ دہی پر مبنی فون کالز اور گفٹ کارڈ اسکیم کے ذریعے امریکی شہریوں کو نشانہ بنا رہا تھا۔
پولیس کے مطابق 25 ستمبر کو سب انسپکٹر گجیندر ماتھر کو اس حوالے سے خفیہ اطلاع ملی تھی۔ اطلاع کی بنیاد پر ویسٹ ڈسٹرکٹ کے اینٹی آٹو تھیفٹ اسکواڈ کی ایک ٹیم نے نارائنا انڈسٹریل ایریا میں ’ویپٹرا‘ کے نام سے چلنے والے ایک بین الاقوامی ٹیک سپورٹ فراڈ کال سینٹر پر چھاپہ مارا۔
چھاپے کے دوران پولیس نے کال سینٹر کے مالک ارون، اس کے ساتھی سلیم اور 5 کالرز کو گرفتار کیا۔ پولیس کا کہنا ہے کہ کالرز لیپ ٹاپ اور ہیڈ فون کے ذریعے امریکی شہریوں سے رابطہ کرتے تھے اور گفتگو کے دوران فرضی انگریزی نام استعمال کرتے تھے۔ کارروائی کے بعد 26 ستمبر کو نارائنا تھانے میں ایف آئی آر درج کی گئی۔ مقدمہ بھارتیہ نیائے سنہتا (بی این ایس) کی دفعات 318(4)، 319(2)، 61(2) اور 3(5) کے علاوہ انفارمیشن ٹیکنالوجی ایکٹ کی دفعہ 66 ڈی کے تحت درج کیا گیا ہے۔
ابتدائی تفتیش میں سامنے آیا کہ ملزمان نے امریکی شہریوں کو نشانہ بنانے کے لیے فرضی ایپل/آئی او ایس ٹیکنیکل سپورٹ کا سیٹ اپ قائم کر رکھا تھا۔ پولیس کے مطابق وہ ٹول فری نمبروں کے ذریعے امریکہ میں موجود لوگوں سے رابطہ کرتے اور خود کو ایپل کا ٹیکنیکل سپورٹ ایگزیکٹو ظاہر کرتے تھے۔
یہ بھی پڑھیں :
ملزمان مبینہ طور پر متاثرین کو بتاتے تھے کہ ان کے موبائل یا کمپیوٹر میں وائرس، میل ویئر یا فحش مواد کا پتہ چلا ہے اور فوری تکنیکی مدد کی ضرورت ہے۔ اس کے بعد انہیں مسئلہ حل کرنے کے بہانے گفٹ کارڈ خریدنے پر آمادہ کیا جاتا تھا۔ پولیس کے مطابق گفٹ کارڈ خریدنے کے بعد کالرز متاثرین سے کارڈ کی تفصیلات یا کوڈ حاصل کر لیتے تھے اور انہیں مبینہ طور پر نیٹ ورک سے وابستہ دیگر افراد تک پہنچا دیتے تھے۔ اس طریقے سے حاصل ہونے والی رقم اور گفٹ کارڈز کے لین دین کی اب مزید جانچ کی جا رہی ہے۔
پولیس نے ضبط کیے گئے لیپ ٹاپس کی ابتدائی جانچ کے دوران آئی بیم، الٹرا ویوئر اور اینی ڈیسک جیسے ریموٹ ایکسس سافٹ ویئر بھی برآمد کیے۔ اس کے علاوہ امریکی نمبروں سے متعلق کال ہسٹری بھی ملی ہے۔
یہ بھی پڑھیں :
کارروائی کے دوران پولیس نے پانچ لیپ ٹاپ، 12 موبائل فون، دو راؤٹر، چھ ہیڈ فون، 10 کریڈٹ اور ڈیبٹ کارڈ، پانچ چیک بک اور ایک آڈی اے 3 35 ٹی ڈی آئی کار ضبط کی ہے۔ گرفتار ملزمان کی شناخت ارون (29) اور سلیم (28) کے طور پر ہوئی ہے، جو کاکروولا کے رہنے والے ہیں۔ دیگر گرفتار افراد میں کاکروولا کا نکھل (30)، پیتم پورہ کا مونٹو سنگھ (34)، کشن گڑھ کا ترہوچو (26)، اتم نگر کا کرن (28) اور ساگرپور کا وشال (29) شامل ہیں۔
پولیس نے بتایا کہ فراڈ نیٹ ورک کے مزید ارکان کا سراغ لگانے کے لیے تفتیش جاری ہے۔ حکام ٹول فری نمبروں کے ماخذ، رابطے میں آنے والے متاثرین، گفٹ کارڈ لین دین اور ضبط کیے گئے ڈیجیٹل شواہد کی جانچ کر رہے ہیں۔ اس کے علاوہ رقم کی منتقلی کے ذرائع کا بھی پتہ لگایا جا رہا ہے۔
