کراچی میں الگ الگ حادثات کے دوران خاتون سمیت دو افراد جاں بحق ہوگئے۔
ماڑی پور روڈ پر ٹرالر کی زد میں آکر خاتون جان سے ہاتھ دھو بیٹھی، جبکہ ملیر ہالٹ کے قریب ریلوے ٹریک پر ٹرین کی زد میں آکر ایک شخص جاں بحق ہوگیا۔
چھیپا حکام کے مطابق ماڑی پور روڈ پر کلری تھانے کی حدود میں کلثوم مسجد کے قریب ٹرالر کی زد میں آکر جاں بحق ہونے والی خاتون کی شناخت 35 سالہ اقراء زوجہ عمران کے نام سے ہوئی۔ خاتون کی لاش ایمبولینس کے ذریعے سول اسپتال منتقل کی گئی۔
کلری تھانے کے ہیڈ محرر فرید کے مطابق خاتون کینٹ اسٹیشن کی رہائشی بتائی جاتی ہے۔ پولیس نے ٹرالر تحویل میں لے کر ڈرائیور کو حراست میں لے لیا اور حادثے کی مزید تفتیش جاری ہے۔
دوسری جانب، ملیر ہالٹ کے قریب ریلوے ٹریک پر ٹرین کی زد میں آکر 24 سالہ شخص جاں بحق ہوگیا۔
چھیپا حکام کے مطابق لاش ایمبولینس کے ذریعے جناح اسپتال منتقل کی گئی، تاہم متوفی کی شناخت تاحال نہیں ہوسکی۔ ترجمان ریلوے پولیس کراچی کے مطابق واقعے کی تحقیقات جاری ہیں۔
