انسدا ددہشتگردی کراچی کی عدالت نے ایم کیوایم رہنماؤں کے خلاف اشتعال انگیز مقدمات میں پارٹی کے رہنماؤں پر فرد جرم عائد کردی۔
کراچی کے مختلف تھانوں میں ایم کیو ایم کے موجودہ اور سابق رہنماؤں کے خلاف اشتعال انگیز تقاریر سے متعلق مقدمات درج ہیں۔ ان رہنماؤں میں سربراہ تنظیم بحالی کمیٹی فاروق ستار، عامر خان، خواجہ اظہار، مئیرکراچی وسیم اختر، رؤف صدیقی، قمر منصور، ریحان ہاشمی، حنید لاکھانی، محفوظ یار خان، امجد اللہ اور دیگر ملزمان کیس میں نامزد ہیں۔
ہفتہ کے روز انسدا د دہشتگردی کی خصوصی عدالت میں بانی ایم کیوایم کی اشتعال انگیز تقاریر سے متعلق ایم کیوایم رہنماؤں کے خلاف درج مقدمات کی سماعت ہوئی تو عدالت نے ملزمان پر فردجرم عائد کردی تاہم ملزمان نے صحت جرم سے انکار کردیا جس کے بعد عدالت نے گواہوں کو طلب کرلیا اور کیس کی سماعت یکم فروری تک ملتوی کردی۔