افغان صدر اشرف غنی نے طالبان اور دیگر مسلح گروہوں کے خلاف سیکورٹی فورسز کو کارروائیاں تیز کرنے کی ہدایت کرتے ہوئے جارحانہ انداز اپنانے کا حکم دے دیا۔
بین الاقوامی میڈیا رپورٹس کے مطابق افغان صدر کی جانب سے یہ احکامات گزشتہ روز جنارے اور اسپتال پر حملوں میں 50 سے زائد افراد کے جاں بحق ہونے کے افسوسناک واقعات کے بعد جاری کیے گئے ہیں۔
ٹیلی ویژن پر نشر ہونے والے خطاب میں افغان صدر نے کہا کہ میں سیکورٹی فورسز کو طالبان سمیت تمام شدت پسند گروہوں اور مسلح جتھوں کے خلاف دفاعی طرز سے جارحانہ انداز میں کارروائیاں شروع کرنے کا حکم دیتا ہوں۔
انہوں نے کہا کہ ہم نے ننگرہار ، کابل اور ملک کے دیگر حصوں میں دہشتگردانہ کارروائیوں کو دیکھا،جو کہ طالبان ، داعش اور دیگر مسلح گروہوں کی جانب سے کی گئیں، ہمیں ملک کی حفاظت و سلامتی کے لیے اپنے دشمنوں کے خلاف بھرپور اور تیز طر کارروائیاں کرنی ہوں گے۔
واضح رہے کہ گزشتہ روز ہونے والے حملوں سے متعلق داعش نے دعویٰ کیا تھا کہ اسپتال اور جنازے پر حملے انہوں نے کیے جب کہ طالبان نے ان حملوں کی ذمہ داری قبول نہیں کی تھی۔