لاہور(جسارت نیوز) پاکستان کرکٹ بورڈ نے دورہ بنگلا دیش کے لیے قومی اسکواڈ کا اعلان ٹی 20 ورلڈ کپ کے سیمی فائنل کے بعد کرنے کا فیصلہ کیا ہے۔ذرائع کے مطابق پی سی بی حکام اور ٹیم کی تمام تر توجہ ورلڈ کپ پر ہے، اس لیے پی سی بی ایونٹ کے دوران کسی بھی قسم کے اعلان سے گریزاں ہے ۔ میگا ایونٹ کے سیمی فائنلز 10 اور 11 نومبر کو طے ہیں جب کہ فائنل 14 نومبر کو کھیلا جائے گا۔ پاکستانی ٹیم پروگرام کے مطابق 15 نومبر کو دبئی سے بنگلا دیش روانہ ہوگی۔پی سی بی نے واضح کیا ہے کہ ٹکٹوں کی بکنگ پہلے سے کرائی جاچکی ہے اور پاکستان نے بنگلا دیش کے خلاف پہلا ٹی 20 میچ 19 نومبر کو کھیلنا ہے۔
