میڈرڈ (صباح نیوز) وزیر خارجہ مخدوم شاہ محمود قریشی نے میڈرڈ میں یواین ورلڈ ٹورازم ہیڈکوارٹر میں سیکرٹری جنرل یو این ورلڈ ٹورازم آرگنائزیشن (یو این ڈبلیو ٹی او) زوراب پولولیکا شویلی سے ملاقات کی۔ مخدوم شاہ محمود قریشی نے کہا کہ وزیر اعظم عمران خان کے وژن کی روشنی میں حکومت پاکستان سیاحت کے فروغ کے لیے10 سالہ روڈ میپ پر عمل پیرا ہے‘حکومت پاکستان سیاحوں کی سہولت کے لیے ای ویزا کے اجرا سمیت متعدد اقدامات اٹھا رہی ہے۔ سیکرٹری جنرل یو این ڈبلیو ٹی او نے سیاحت کے فروغ کے لیے حکومت پاکستان کی جانب سے اٹھائے گئے اقدامات کو سراہتے ہوئے سیاحت کے فروغ کے لیے بھرپور معاونت کی فراہمی کا یقین دلایا۔