کوئٹہ (اے پی پی) وفاقی وزیر برائے منصوبہ بندی و ترقی اسد عمر نے کہا ہے کہ حکومتی پالیسی کا محور معیشت کی ترقی کے ساتھ عام آدمی کو ریلیف دینا ہے‘ مقامی صنعتوں کو درپیش مسائل کا ہمیں ادراک ہے۔ ان خیالات کا اظہار انہوں نے اتوارکے روز بلوچستان کے علاقے لسبیلہ گڈانی کے دورہ موقع پر پاکستان شپ بریکرز ایسوسی ایشن کے چیئرمین رفیق سلام کی قیادت میں مقامی صنعت کاروں کے وفد سے بات چیت کرتے ہوئے کیا۔ انہوں نے کہا کہ گڈانی شپ بریکنگ یارڈ کے مسائل اور کسٹم ٹیکس ٹیرف سے متعلق تجاویز پر گفتگو کرتے ہوئے کہا کہ انڈسٹری کی ترقی کے لیے صنعت کاروں کو ساتھ لیکر چلیں گے ‘ گڈانی میں اسپیشل اکنامک زون قائم اور صنعتکاروں کی ہرممکن حوصلہ افزائی کی جائے گی ۔