اوسلو (آن لائن) طالبان کا ایک وفد افغان وزیر خارجہ امیر خان متقی کی قیادت میں ناروے پہنچ گیا، جہاں ناروے کی حکومت سے افغانستان کی موجودہ صورتحال پر مذاکرات کیے جائیں گے۔ غیر ملکی خبر رساں ادارے کے مطابق افغان وزیر خارجہ امیر خان متقی کی قیادت میں طالبان کے ایک وفد نے اوسلو میں مغربی حکام کے ساتھ اپنی اہم ملاقاتوں سے قبل افغان سول سوسائٹی کے ارکان کے ساتھ انسانی حقوق سے متعلق بات چیت کا آغاز کیا ہے۔ افغان وفد نے اپنے 3 روزہ دورے کے پہلے روز افغان خواتین کے حقوق کیلیے سرگرم سماجی کارکنوں اور انسانی حقوق کے رضاکاروں سے بات چیت کی۔ مذاکرات سے پہلے طالبان کے نائب وزیر ثقافت اور اطلاعات نے امیر خان متقی کا ایک بیان جاری کیا ہے۔ جس میں کامیابیوں سے بھرے اچھے سفر کی امید کا اظہار اور ناروے کا شکریہ ادا کیا گیا تھا، جس ملک کے بارے میں انہوں نے امید ظاہر کی کہ وہ یورپ کے ساتھ مثبت تعلقات کیلیے ایک ذریعہ بن جائے گا۔