کراچی :سندھ ہائیکورٹ نے لاپتا افراد کی بازیابی سے متعلق درخواستوں پر سماعت کے دوران پولیس اور دیگر حکام کو لاپتا افراد کو فوری بازیاب کرانے کی ہدایت کرتے ہوئے سماعت 31 مارچ تک ملتوی کردی۔
سندھ ہائیکورٹ میں لاپتا افراد کی بازیابی سے متعلق درخواستوں پر سماعت ہوئی۔دوران سماعت ایک لاپتا شہری کی بہن نے کہا کہ میرا بھائی سید علی مہدی 4 سال سے لاپتا ہے۔ چار سال میں دس جے آئی ٹیز کے سامنے بیان ریکارڈ کراچکے ہیں۔ والد کا انتقال ہوگیا ہے میری ماں بھی بیمار ہیں۔ ایک لاپتہ شہری کی بیوی نے بتایا کہ شوہر 2018 سے لاپتا ہے۔ حکام نے بتایا کہ شہریوں سے متعلق مختلف اداروں خطوط لکھے ہیں، جواب آنے تک مہلت دی جائے۔ پی ٹی ایف کی رپورٹ بھی تاحال موصول نہیں۔
عدالت نے آئندہ سماعت پر لاپتا علی مہدی سمیت دیگر لاپتا شہریوں سے متعلق پی ٹی ایف رپورٹ طلب کرلی۔ عدالتنے پولیس اور دیگر حکام کو لاپتا افراد کو فوری بازیاب کرانے کی ہدایت کرتے ہوئے سماعت 31 مارچ تک ملتوی کردی۔
