انقرہ (انٹرنیشنل ڈیسک) جرمن چانسلر اولاف شولز یوکرائن جنگ کے تناظر میں ترکی پہنچ گئے، جہاں صدر رجب طیب اردوان نے ان کا استقبال کیا۔ خبررساں اداروں کے مطابق گزشتہ برس دسمبر میں چانسلر کا عہدہ سنبھالنے کے بعد ان کا یہ ترکی کا پہلا سرکاری دورہ ہے۔ انقرہ میں انہوں نے ترک صدر رجب طیب اردوان سے ملاقات کی،جس کے بعد دونوں رہنماؤں نے ایک مشترکہ پریس کانفرنس سے خطاب کیا۔ دونوں رہنماؤں کے درمیان روس اور یوکرائن کی جنگ اور ترک یورپی یونین تعلقات کے بارے میں بھی بات چیت کی گئی۔
