حیدر آباد: بھارت میں حکمراں جماعت بی جے پی کے ایک اور رکن اسمبلی کی جانب سے نبی اکرمؐ کی شان میں گستاخی کی گئی ہے، جس کے بعد مسلمانوں کی جانب سے بھرپور احتجاج کے نتیجے میں اسے گرفتار کرلیا گیا۔
بھارتی میڈیا کے مطابق ریاست تلنگانہ سے تعلق رکھنے والے بی جے پی کے ہندو انتہا پسند رکن اسمبلی ٹی راجا سنگھ کو نبی اکرمؐ کی شان میں گستاخی پر گرفتار کرلیا گیا۔ پولیس کے مطابق گزشتہ رات بھر شدید احتجاج کے بعد ٹی راجا سنگھ کے خلاف مذہبی عقائد کی توہین سے متعلق مقدمہ درج کیا گیا ہے۔
بی جے پی رہنما کی جانب سے توہین آمیز تبصرے پر مبنی وڈیو وائرل ہونے پر حیدر آباد سمیت مختلف علاقوں اور پولیس اسٹیشنز کے باہر احتجاج شروع ہوگیا۔ مظاہرین کا کہنا تھا کہ ٹی راجا سنگھ نے نبی کریمؐ کی شان میں گستاخی کرکے مسلمانوں کے جذبات کو ٹھیس پہنچائی ہے۔
احتجاج کرنےو والوں کی جانب سے گستاخ رکن اسمبلی کی فوری گرفتاری کا مطالبہ کیا جا رہا تھا، جس کے بعد پولیس نے کارروائی کرتے ہوئے ٹی راجا سنگھ کو گرفتار کرلیا۔