کراچی: محکمہ تعلیم سندھ نے عام انتخابات سے قبل اسکولوں کی عمارتوں کی مرمت کے لیے 1538 ملین روپے مانگ لیے ہیں۔
محکمہ تعلیم سندھ کے سیکشن آفیسر کی جانب سے محکمہ خزانہ کو لکھے گئے خط کے مطابق صوبے بھر میں 382 اسکولوں کی عمارتوں کی مرمت کے لیے 1538 ملین روپے کے فنڈز مختص کرنے کا مطالبہ کیا گیا ہے۔
خط میں لکھا گیا کہ عام انتخابات کے دوران محفوظ پولنگ کو یقینی بنانے کے لیے دادو، قمبر اور شہداد کوٹ میں خستہ حال اسکولوں کی عمارتوں کی عام انتخابات سے قبل مرمت کی ضرورت ہے۔
توقع ہے کہ عام انتخابات جنوری 2024 کے وسط یا آخر میں ہوں گے تاہم الیکشن کمیشن آف پاکستان کی جانب سے ابھی تک کوئی باضابطہ اعلان نہیں کیا گیا ہے۔
پاکستان پیپلز پارٹی، پاکستان تحریک انصاف اور دیگر سمیت سیاسی جماعتیں ای سی پی سے انتخابات کی تاریخ کا اعلان کرنے کا مطالبہ کر رہی ہیں۔
قبل ازیں نگراں وزیراعظم انوار الحق کاکڑ نے کہا تھا کہ الیکشن کمیشن آف پاکستان کا اختیار ہے کہ وہ انتخابات کی تاریخ کا اعلان کرے۔
نجی ٹی وی چینل کے ایک ٹاک شو کے دوران اپنے خیالات کا اظہار کرتے ہوئے نگراں وزیراعظم نے کہا کہ نگراں سیٹ اپ انتخابی عمل میں معاونت، امن و امان اور انتخابات کے انعقاد سے متعلق مالی معاملات کی دیکھ بھال کے لیے تیار ہے۔