اسلام آباد: عدالت عالیہ نے مسلم لیگ ن کے قائد نواز شریف کی ایون فیلڈ اور العزیزیہ ریفرنس میں اپیلیں سماعت کے لیے مقرر کرلیں۔
رجسٹرار اسلام آباد ہائی کورٹ نے اپیل سماعت کے لیے مقرر کرنے سے متعلق اعلامیہ جاری کردیا ہے، جس کے مطابق 21 نومبر کو ایون فیلڈ اور العزیزیہ ریفرنس میں نواز شریف کی اپیلوں پر سماعت ہوگی۔
اعلامیے کے مطابق چیف جسٹس اسلام آباد ہائی کورٹ جسٹس عامر فاروق اور جسٹس میاں گل حسن اورنگزیب نواز شریف کی درخواستوں کی سماعت کریں گے۔
واضح رہے کہ اسلام آباد ہائیکورٹ نے وطن واپسی پر نواز شریف کی جانب سے احتساب عدالت کے العزیزیہ اور ایون فیلڈ ریفرنسسز میں سزا کے خلاف دائر اپیلیں بحال کیں تھیں، جس میں سابق وزیراعظم نواز شریف نے احتساب عدالت کے فیصلوں کو 2018 سے چیلنج کر رکھا ہے۔