پشاور: نومنتخب چیئرمین پی ٹی آئی بیرسٹر گوہر نے کہا ہے کہ میرا منصب عمران خان کی امانت ہے جب کہ پارٹی کی انتخابات کے لیے تیاریاں مکمل ہیں۔
میڈیا کے نمائندوں سے بات چیت کرتے ہوئے بیرسٹر گوہر نے کہا کہ پارٹی میں آئندہ بھی فیصلے وہی ہوں گے جو سابق چیئرمین پی ٹی آئی کریں گے۔ میں ان کے جانشین کے طور پر ذمے داریاں نبھاؤں گا۔
انہوں نے کہا کہ فی الوقت ہماری لیڈرشپ انڈر گراؤنڈ ہے، تاہم چیئرمین عمران خان تھے اور تاحیات وہی رہیں گے۔ عمران خان نے موروثی سیاست ختم کی۔ ہم اس ملک کو آگے لے کر جائیں گے۔ ہماری الیکشن کے لیے تیاریاں مکمل ہیں۔
بیرسٹر گوہر کا کہنا تھا کہ تحریک انصاف ایک ایسی عوامی طاقت ہے جسے کوئی شکست نہیں دے سکتا۔ انتخابات کے روز مخالفین کی ضمانتیں ضبط ہو جائیں گی۔