راولپنڈی: بانی پاکستان تحریک انصاف نے کہا ہے کہ پنجاب کے ضمنی انتخابات طے شدہ تھے۔
اڈیالہ جیل میں میڈیا سے گفتگو کرتے ہوئے بانی پی ٹی آئی عمران خان نے کہا کہ ضمنی انتخابات میں پہلے ہی ڈبے بھرے ہوئے تھے۔ملک میں کوئی جمہوریت نہیں یہ 8 فروری سے ڈرے ہوئے تھے، جمہوریت، قانون کی بالادستی اور فری اینڈ فیئر الیکشن پر کھڑی ہوتی ہے مگر یہاں جنگل کا قانون ہے۔
ان کا کہنا تھا کہ کے پی کے میں بھی انتخابات ہوئے پولیس نے کہیں کوئی ایف آئی آر نہیں کاٹی اور نہ ہی دھاندلی ہوئی۔ پنجاب کے ضمنی انتخابات میں پولیس نے مداخلت کی پنجاب کا ضمنی انتخابات پولیس نے لڑا ہے۔
انہوں نے کہا کہ اکتوبر سے فروری تک الیکشن صرف پاکستان تحریک انصاف کو کرش کرنے کے لیے ملتوی کیے گئے، سپریم کورٹ میں بھی ہماری پٹیشن اس لیے نہیں سنی گئی کہ وہ بھی پی ٹی آئی کے کرش ہونے کا انتظار کررہی تھی۔ پی ٹی آئی کا نام و نشان ختم کرنے کے لیے ہر حربہ استعمال کیا گیا۔