معاشرے کی پیچیدگیاں اس قدر بڑھ گئی ہیں کہ اب لوگ ذرا سی بات پر لڑ پڑتے ہیں اور یہ بھی نہیں سوچتے کہ جس بات کے لیے وہ لڑ رہے ہیں اُس کی کچھ بھی وقعت نہیں۔ نئی نسل اس حوالے سے خاصی بے شعور ہے اور اُس کی مناسب رہنمائی کا اہتمام بھی نہیں کیا جارہا۔
جنوبی پنجاب کے ضلع رحیم یار خان کی تحصیل لیاقت پور کے صدر مقام لیاقت پور میں ایک اندوہ ناک واقعہ رونما ہوا ہے جس میں ایک نوجوان کی جان چلی گئی۔
17 سالہ مختار اور اُس کے دوست کے درمیان محض 500 روپے اُدھار مانگنے پر تکرار ہوگئی۔ دونوں دوستوں میں پہلے توتو میں میں ہوئی جو دیکھتے ہی دیکھتے باضابطہ جھگڑے کی شکل اختیار کرگئی۔ ایک دوسرے کو مغلظات بکنے کے ساتھ ساتھ انہوں نے ہاتھا پائی بھی شروع کردی۔
لڑائی کے دوران ایک کے ہاتھ میں لوہے کا سریا آگیا۔ اس نے وہ سریا مختار کے سر پر دے مارا۔ سر پر بھاری چوٹ لگنے سے مختار گر پڑا اور بے ہوش ہوگیا۔ اُسے زخمی ہوکر گرتے دیکھ کر دوست بھاگ گیا۔ لوگوں نے مختار کو قریبی اسپتال پہنچایا تاہم وہ جانبر نہ ہوسکا۔
لیاقت پور پولیس نے مقدمہ درج کرکے ملزم کی تلاش شروع کردی ہے۔ کئی مقامات پر چھاپے مارے گئے ہیں۔