کراچی : ایڈیشنل ڈسٹرکٹ اینڈ سیشن جج کراچی نے رحمن ڈکیت پولیس مقابلے کے کیس کا فیصلہ سناتے ہوئے عزیر بلوچ اور غفار عرف ماما کو بری کر دیا۔
میڈیا رپورٹس کے مطابق سرغنہ لیاری گینگ وار عزیر بلوچ و دیگر کے خلاف کیس کی سماعت ہوئی، عدالت نے عدم شواہد پر دونوں ملزمان کو بری کر دیا۔
عزیر بلوچ کے وکیل نے کہا کہ عزیر بلوچ کے خلاف پولیس کے پاس کوئی شواہد نہیں، پراسیکیوشن کے گواہان کے بیان میں تضاد ہے، عزیر بلوچ اب تک 39 مقدمات میں بری ہو چکے ہیں۔
پولیس نے کہا کہ ملزمان کے خلاف 2009 میں اسٹیل ٹاؤن تھانے میں مقدمہ درج کیا گیا تھا، عزیر بلوچ کے خلاف 50 سے زائد مقدمات مختلف تھانوں میں درج ہیں۔