تحریکِ انصاف (پی ٹی آئی) نے دعویٰ کیا ہے کہ پارٹی کے چیئرمین بیرسٹر گوہر اور سیکریٹری جنرل سلمان اکرم راجا کو گرفتار کر لیا گیا ہے۔
پی ٹی آئی کے مطابق دونوں رہنما راولپنڈی کی طرف جا رہے تھے جب اسلام آباد پولیس نے انہیں سیکٹر ایچ 13 کے قریب روکا۔ پولیس نے ان کی گاڑی کو روک کر انہیں ایک وین میں ڈال دیا اور نامعلوم مقام پر لے گئی۔
اس واقعے کے ساتھ ہی راولپنڈی میں لیاقت باغ پہنچنے والے متعدد پی ٹی آئی کارکنان کی بھی گرفتاری کی اطلاعات ہیں۔
مزید برآں کمیٹی چوک پر پولیس نے پی ٹی آئی کے کارکنان کے خلاف شیلنگ کی، جس کے نتیجے میں کئی کارکنان کو حراست میں لے لیا گیا۔ اس دوران پی ٹی آئی کارکنوں کی جانب سے پولیس پر پتھراؤ بھی کیا گیا جس نے صورتحال کو مزید خراب کر دیا۔
تحریکِ انصاف کی جانب سے ان گرفتاریوں کی شدید مذمت کی گئی ہے اور انہیں سیاسی انتقام قرار دیا جا رہا ہے۔
پارٹی کے رہنماؤں کا کہنا ہے کہ ان کی پارٹی کے خلاف کارروائیاں آئینی حقوق کی خلاف ورزی ہیں اور اس کے خلاف احتجاج جاری رہے گا۔