راولپنڈی:بانی چیئرمین پی ٹی آئی کی بہن علیمہ خان نے کہا ہے کہ عمران خان نے نوجوانوں کو 24 نومبر احتجاج کی تیاری کا پیغام دیا ہے۔
میڈیا کے نمائندوں سے بات کرتے ہوئے علیمہ خان کا کہنا تھا کہ احتجاج کرناہمارا قانونی و آئینی حق ہے۔ ہمارے مطالبات تسلیم کیے جانے تک احتجاج کا سلسلہ رکے گا نہیں۔ عوام 24 تاریخ کے لیے تیاری کریں کیوں کہ یہ فائنل کال ہے۔
انہوں نے بتایا کہ بانی چیئرمین پی ٹی آئی عمران خاننے آج دوبارہ 24 نومبر کی احتجاج کے لیے کال کے حوالے سے بات کی ہے۔ عمران خان نے پی ٹی آئی کے سوشل میڈیا ٹائیگرز، طلبہ اور نوجوانوں کو مخاطب کرتے ہوئے پیغام دیا ہے کہ اپنے مستقبل کی خاطر کھڑے ہوں، ملک کو نہ چھوڑیں کیوں کہ اب پاکستان کوبچانا ہے۔
علیمہ خان نے کہا کہ عمران خان نے سمندر پار پاکستانیوں کو بھی پیغام دیا ہے کہ وہ 24 نومبر کو دنیا بھر میں اپنا احتجاج ریکارڈ کروائیں۔