سکھر (نمائندہ جسارت) امریکی قونصل جنرل اسکاٹ اربم کا شمالی سندھ کا دورہ، پاک، امریکا تعلقات مضبوط بنانے اور معاشی ترقی میں تعاون کا اعادہ، امریکی قونصل جنرل اسکاٹ اربم نے شمالی سندھ کا دورہ کیا، جہاں انہوں نے پاکستان کی ترقی اور خوشحالی کے لیے امریکا کے مسلسل عزم کا اعادہ کیا، تعلیم کو فروغ دینے، خواتین کو بااختیار بنانے، صحت کی دیکھ بھال اور میونسپل خدمات میں بہتری لانے جیسے اقدامات کے ذریعے قونصل جنرل نے صوبے میں امریکی ترقیاتی منصوبوں کے مثبت اثرات کو اُجاگر کیا۔ خیرپور میرس میں قونصل جنرل اربم نے حسین آباد گورنمنٹ ہائر سیکنڈری اسکول میں جدید ترین (سائنس، ٹیکنالوجی، انجینئرنگ، آرٹس اور ریاضی) لیب کا افتتاح کیا، یہ لیب دی داؤد فاؤنڈیشن کے تعاون سے امریکی قونصلیٹ کے پبلک ڈپلومیسی گرانٹ کے تحت قائم کی گئی ہے، جس کا مقصد پسماندہ کمیونٹیز کے لیے عملی تعلیم کو فروغ دینا ہے۔ قونصل جنرل نے کہا یہ لیب امریکی حکومت کے اس عزم کی عکاسی کرتی ہے کہ تخلیقی صلاحیتوں کو فروغ دیا جائے اور پاکستان کے نوجوانوں کو ایسے ہنر فراہم کیے جائیں جو ان کے مستقبل کی تشکیل میں مددگار ہوں۔ یہ اسکول USAID سندھ بیسک ایجوکیشن پروگرام کے تحت تعمیر کیے گئے 106 اداروں میں سے ایک ہے جو سندھ میں معیاری تعلیم تک رسائی بہتر بنانے کے لیے مدد فراہم کر رہا ہے۔ سچل سرمست لائبریری میں اربم نے اکیڈمی فار ویمن انٹرپرینیورز پروگرام کی 2022 کی جماعت کی شرکاء سے ملاقات کی، جنہوں نے فوڈ اور دستکاری جیسے شعبوں میں کامیاب کاروبار شروع کیے ہیں۔ انہوں نے کہا خواتین کاروباری افراد ترقی کی کلیدی محرک ہیں اور ہم ان پروگراموں کی حمایت پر فخر محسوس کرتے ہیں جو صلاحیتوں کو اُجاگر کرتے اور قیادت کی ترغیب دیتے ہیں۔ آئی بی اے یونیورسٹی میں اربم نے English Works پروگرام کے 150 طلباء سے ملاقات کی، جو نوجوانوں کو روزگار اور کاروباری مہارتوں سے آراستہ کرتا ہے۔ انہوں نے سندھ میں 375 طلباء کی تربیت پر پروگرام کی تعریف کی اور شرکاء کو مستقبل کے رہنما کے طور پر اپنے کردار کو اپنانے کی ترغیب دی۔ جیکب آباد میں اربم نے USAID کے تعاون سے چلنے والے جیکب آباد انسٹی ٹیوٹ آف میڈیکل سائنسز کا دورہ کیا، جو 133 بستروں پر مشتمل اسپتال اور 10 لاکھ سے زائد افراد کو خدمات فراہم کرتا ہے۔ انہوں نے خواتین، بچوں اور پسماندہ کمیونٹیز کے لیے معیاری صحت کی دیکھ بھال کے حوالے سے اسپتال کے کردار کو سراہتے ہوئے کہا ہم مل کر پاکستان میں روشن مستقبل کو یقینی بنا رہے ہیں۔ اربم نے جیکب آباد میں USAID کے تعاون سے چلنے والے پانی کی فلٹریشن پلانٹ کا بھی دورہ کیا، جو 14,000 سے زائد گھرانوں کو صاف پانی فراہم کرتا ہے۔ انہوں نے کہا صاف پانی تک رسائی صحت اور خوشحالی کے لیے بنیادی حیثیت رکھتی ہے، یہ پلانٹ امریکا کے پائیدار ترقی کے عزم کی عکاسی کرتا ہے، مقامی حکام سے ملاقاتوں کے دوران اربم نے میونسپل خدمات، جیسے کہ فضلہ مینجمنٹ اور انفرااسٹرکچر کے لیے امریکی حمایت کا اعادہ کیا اور ان سرمایہ کاریوں کو برقرار رکھنے کے لیے کمیونٹی کی کوششوں کو سراہا۔