لاہور (صباح نیوز) وزیراعلیٰ مریم نواز نے جنوبی پنجاب میں مطلقہ اور بیواؤں کو گائیں اور بھینسیں دینے کا اعلان کردیا۔ ترجمان وزیراعلیٰ پنجاب کے مطابق وزیراعلیٰ پنجاب مریم نواز نے جنوبی پنجاب کی11ہزار نادار دیہی خواتین کے لیے 2 ارب کے تاریخی پیکیج کا اعلان کیا ہے جس کے تحت مطلقہ اور بیواؤں کو گزر اوقات کے لیے گائیں اور بھینسیں دی جائیں گے۔ منصوبے کے تحت ڈیرہ غازی، مظفر گڑھ، راجن پور، لیہ اور کوٹ ادو میں دیہی خواتین کو بھینس اور گائیں مفت ملیں گی۔ ملتان، خانیوال، لودھراں، وہاڑی، بہاولپور، بہاولنگر اور رحیم یار خان کی دیہی خواتین کو بھی گائے اور بھینسیں دی جائیں گی۔نادار دیہی خواتین گائے اور بھینسیں پال کر اور دودھ بیچ کر باعزت روزگار کما سکیں گی۔ لائیو اسٹاک پروجیکٹ سے اچھی نسل کی گائے، بھینسیں پال کر دودھ کی پیداوار میں بھی اضافہ ہوگا۔ 12 اضلاع کی دیہی خواتین لائیو اسٹاک پروجیکٹ کے لیے
اپلائی کر سکتی ہیں۔ وزیر اعلیٰ مریم نواز کا کہنا ہے کہ پنجاب کی دیہی خواتین کی مالی خودمختاری ترجیحات میں شامل ہے، ان خواتین کو لائیو اسٹاک پروجیکٹ سے روزگار کے مواقع ملیں گے۔