ٹوکیو: سمندری طوفان پیپاہ نے جاپان کے جنوب مغربی علاقوں میں تباہی مچا دی، طوفانی ہواؤں اور بارشوں کے نتیجے میں متعدد مکانات کی چھتیں اُڑ گئیں، گاڑیاں اُلٹ گئیں جبکہ 24 افراد زخمی اور 220 عمارتیں متاثر ہوئیں۔
مقامی میڈیا کے مطابق طوفان سب سے پہلے کوچی سے ٹکرایا، جس کے بعد شہر شیزوکا میں موسلا دھار بارشیں شروع ہوگئیں۔ تیز ہواؤں کے باعث درجنوں حادثات پیش آئے جن میں عمارتوں کو نقصان پہنچا اور کئی سڑکیں جزوی طور پر بلاک ہوگئیں۔
رپورٹس کے مطابق پیپاہ اب تیزی سے جاپان کے دارالحکومت ٹوکیو کی سمت بڑھ رہا ہے، جبکہ شیزوکا اور واکایاما میں بارشوں کے ساتھ لینڈ سلائیڈنگ اور شدید سیلاب کا خطرہ بڑھ گیا ہے۔ واکایاما کے کئی علاقوں میں مکانوں کی چھتیں اُڑ گئیں اور متعدد گاڑیاں اُلٹنے کی اطلاعات بھی سامنے آئی ہیں۔
حکام نے طوفان کے پیش نظر ہائی الرٹ جاری کرتے ہوئے شہریوں کو گھروں میں رہنے اور غیر ضروری سفر سے گریز کی ہدایت کی ہے۔
محکمہ موسمیات نے خبردار کیا ہے کہ آئندہ گھنٹوں میں طوفان مزید شدت اختیار کرسکتا ہے جس کے باعث وسیع پیمانے پر نقصانات کا اندیشہ ہے۔