کوئٹہ میں سندھ کے شہر شکارپور سے بلوچستان کے دارالحکومت کوئٹہ جانے والی 18 انچ قطر کی گیس پائپ لائن مچھ کے قریب تباہ ہوگئی، جس کے باعث کوئٹہ کو گیس کی سپلائی منقطع ہوگئی ہے۔
سوئی سدرن گیس کمپنی کے حکام نے تصدیق کی ہے کہ پائپ لائن کی مرمت ہونے تک کوئٹہ کو صرف کھانے کے اوقات میں محدود گیس فراہم کی جائے گی۔
حکام نے بتایا کہ پائپ لائن متاثر ہونے سے مستونگ، پشین اور زیارت کو بھی گیس کی فراہمی معطل ہوگئی ہے۔ تاہم، ابھی تک یہ واضح نہیں ہوسکا کہ واقعہ لیکیج کی وجہ سے آیا یا تخریب کاری کا نتیجہ تھا، اس حوالے سے تحقیقات جاری ہیں تاکہ اصل وجہ سامنے آسکے۔
یہ واقعہ حالیہ مہینوں میں ملک میں گیس پائپ لائنز پر ہونے والے متعدد حملوں کا تازہ ترین واقعہ ہے۔ گزشتہ چند ماہ میں خیبر پختونخوا اور پنجاب میں بھی شرپسندوں نے مین گیس پائپ لائنوں کو دھماکے سے اڑا کر سپلائی معطل کی تھی، جس سے شہریوں اور صنعتوں کو شدید مشکلات کا سامنا کرنا پڑا تھا۔
