باجوڑ کی تحصیل سالارزئی میں پولیو مہم کی سیکورٹی پر مامور اہلکاروں پر فائرنگ کے واقعے میں ایک پولیس اہلکار اور ایک راہگیر جان سے ہاتھ دھو بیٹھے۔ ڈی پی او کے مطابق حملے کے فوراً بعد علاقے میں اضافی نفری تعینات کر دی گئی ہے اور ملزمان کی گرفتاری کے لیے مختلف مقامات پر چھاپے مارے جا رہے ہیں۔
شہید پولیس اہلکار کی نمازِ جنازہ پولیس لائن سول کالونی میں ادا کی گئی، جس میں ڈپٹی کمشنر، ڈی پی او سمیت سول و عسکری حکام اور اہلکاروں کی بڑی تعداد نے شرکت کی۔
وزیراعلیٰ خیبرپختونخوا سہیل آفریدی نے واقعے کی شدید مذمت کرتے ہوئے کہا کہ پولیو ٹیم پر حملہ انسانیت اور قومی فریضے پر حملہ ہے۔ انہوں نے اس عزم کا اظہار کیا کہ ملوث عناصر کو قانون کے کٹہرے میں لایا جائے گا اور معصوم بچوں کے تحفظ کے لیے پولیو مہم ہر صورت جاری رکھی جائے گی۔
