نئی دہلی: ہندوتوا کی پیروکار مودی حکومت کے وزیر داخلہ امت شاہ کو بم سے اڑانے کی دھمکی۔احمد آباد میں چار اسکولوں کو بم سے اڑانے کی دھمکی دینے والا ای میل موصول ہوا ہے۔ ای میل میں وزیر داخلہ امت شاہ اور گینگسٹر لارنس بشنوئی کا نام لیا گیا ہے۔
گجرات کے شہر احمد آباد میں ایک بڑا دھمکی آمیز ای میل سامنے آیا ہے۔ اس ای میل میں چار اسکولوں کو بم سے اڑانے کی دھمکی دی گئی ہے۔ دھمکی والے ای میل میں وزیر داخلہ امت شاہ اور سابرمتی جیل میں قید ملزم گینگسٹر لارنس بشنوئی کا بھی ذکر کیا گیا ہے۔
17 دسمبر کوصبح 8:35 بجے احمد آباد میں واقع چار اسکولوں کو بم سے اڑانے کی دھمکی موصول ہوئی۔ دھمکی والے ای میل کے موضوع میں لکھا گیا تھا کہ دوپہر 1:11 بجے بم دھماکے ہوں گے۔ ای میل میں مزید کہا گیا کہ یہ دھماکے اسکولوں سے لے کر سابرمتی جیل تک کیے جائیں گے۔ میل کے پیغام میں وزیر داخلہ امت شاہ اور گینگسٹر لارنس بشنوئی کا نام بھی شامل ہے۔
جن اسکولوں کو دھمکی دی گئی ان میںزیویئر اسکول،مہاراجہ اگریسن،ڈی اے وی انٹرنیشنل اسکول اور جائیڈز اسکول شامل ہیں
میڈیا رپورٹس کے مطابق ای میل کی زبان سے اندازہ لگایا جا رہا ہے کہ یہ پیغام خالصتانی دہشت گردوں کی جانب سے بھیجا گیا ہے۔ ای میل میں ہدف کے طور پر وزیر داخلہ امت شاہ اور لارنس بشنوئی کا نام واضح طور پر درج ہے۔
ای میل میں کینیڈا میں ہردیپ سنگھ نجر کے قتل کا بدلہ لینے کی نیت کا اظہار کیا گیا ہے۔ دہشت گردوں نے دھمکی دیتے ہوئے لکھا ہے کہ ہندو گجراتی امت شاہ کو اس کے نتائج بھگتنے ہوں گے۔
دھمکی آمیز ای میل کی اطلاع ملتے ہی احمد آباد پولیس نے چاروں اسکولوں میں تفصیلی تفتیش کی۔ تحقیقات کے دوران کوئی مشکوک چیز برآمد نہیں ہوئی۔ پولیس کے جائنٹ سی پی شرد سنگھل کے مطابق، فی الحال صورتحال قابو میں ہے، لیکن احتیاطی تدابیر کے طور پر سخت حفاظتی انتظامات کیے گئے ہیں۔
اس سے پہلے بھی احمد آباد کے اسکولوں کو اسی نوعیت کی دھمکیاں موصول ہو چکی ہیں۔ پولیس اس ای میل کے معاملے میں مکمل ہوشیاری برت رہی ہے۔
ای میل میں وزیر داخلہ امت شاہ کے ساتھ ملزم گینگسٹر لارنس بشنوئی کا نام بھی شامل ہے۔ لارنس بشنوئی کو طویل عرصے سے گجرات کی سب سے ہائی ٹیک اور ہائی پروفائل سابرمتی جیل میں قید رکھا گیا ہے۔
