وزیر خارجہ اسحاق ڈار اور سعودی عرب کے وزیر خارجہ فیصل بن فرحان کے درمیان ٹیلیفونک رابطہ ہوا ہے، جس میں خطے کی تازہ صورتحال پر تفصیلی تبادلہ خیال کیا گیا۔
ترجمان دفتر خارجہ کے مطابق دونوں رہنماؤں نے علاقائی پیش رفت اور موجودہ چیلنجز پر گفتگو کی۔
اسحاق ڈار نے گفتگو کے دوران خطے میں کشیدگی بڑھانے والے اقدامات سے گریز کی ضرورت پر زور دیتے ہوئے کہا کہ تمام فریقین کو اشتعال انگیز اقدامات سے اجتناب کرنا چاہیے۔ انہوں نے کہا کہ علاقائی امن اور استحکام کے لیے تحمل اور ذمہ داری کا مظاہرہ ناگزیر ہے۔
وزیر خارجہ اسحاق ڈار کا کہنا تھا کہ خطے میں موجود تنازعات کا حل صرف مذاکرات اور سفارت کاری کے ذریعے ہی ممکن ہے۔ دونوں وزرائے خارجہ نے اس بات پر اتفاق کیا کہ علاقائی امن کے فروغ کے لیے باہمی رابطے اور تعاون کو مزید مضبوط رکھا جائے گا۔
