اسلام آباد:وفاقی وزیر پارلیمانی امور طارق فضل چوہدری نے پاک فضائیہ کی افغان سرحد پر دہشت گرد ٹھکانوں کے خلاف مؤثر کارروائی کے بعد کہا ہے کہ پاکستان کے خلاف سازشیں کرنے والوں کو ایک واضح پیغام پہنچ گیا ہے کہ یہ سرزمین کمزور نہیں بلکہ شہداء کے لہو سے مضبوط ہوئی ہے۔
وزیر نے سماجی رابطے کی ویب سائٹ ایکس پر جاری اپنے پیغام میں کہا کہ افغانستان میں بھارتی سرپرستی میں موجود فتنہ الخوارج کے ٹھکانوں پر بروقت آپریشن میں معصوم جانوں کا بدلہ لیا گیا ہے، یہ کارروائی صرف ایک فوجی اقدام نہیں بلکہ ہر اُس ماں کے آنسوؤں کا جواب تھا جس نے اپنے بیٹے کو وطن پر قربان کیا اور ہر اُس بچے کے خوابوں کا دفاع تھا جو ایک محفوظ پاکستان کا خواہاں ہے۔
طارق فضل چوہدری نے مزید کہا کہ پاکستان کو کمزور سمجھنے کی غلطی کوئی نہ کرے۔ ہم امن کے خواہاں ضرور ہیں لیکن اپنی سرزمین، عوام اور قومی وقار پر کوئی سمجھوتہ نہیں کریں گے۔
وفاقی وزیر نے اس بات پر بھی زور دیا کہ دہشت گردی کے خلاف اقدامات جاری رہیں گے اور پاکستان ہر قسم کی داخلی و خارجی خطرات سے اپنی حفاظت کے لیے مکمل تیار ہے، یہ کارروائیاں عوام کی جان و مال کے تحفظ اور قومی سالمیت کے دفاع کے لیے ناگزیر ہیں۔
