سرفراز بگٹی نے کوئٹہ میں بلوچستان اسمبلی کے باہر میڈیا سے گفتگو کرتے ہوئے کہا ہے کہ صوبے میں امن کے قیام کیلئے تمام قبائل کو سکیورٹی فورسز کے ساتھ مکمل تعاون کرنا ہوگا۔ انہوں نے کہا کہ امن اور استحکام ہی ترقی کی بنیاد ہے اور عوام کا کردار اس حوالے سے انتہائی اہم ہے۔
وزیراعلیٰ نے بلیدہ میں خواتین کے قتل کے واقعے کی شدید مذمت کرتے ہوئے کہا کہ ایسے واقعات ناقابل برداشت ہیں اور حکومت اس معاملے کو سنجیدگی سے دیکھ رہی ہے۔ انہوں نے کہا کہ جرائم میں ملوث عناصر کے خلاف کارروائی جاری رہے گی اور عوام کو بھی امن کیلئے اپنا کردار ادا کرنا ہوگا۔
انہوں نے کہا کہ بلوچستان کے مختلف علاقوں میں قبائل نے خود امن قائم کرنے میں اہم کردار ادا کیا ہے، خاص طور پر ڈیرہ بگٹی اور دیگر علاقوں میں قبائلی تعاون سے حالات بہتر ہوئے ہیں۔ وزیراعلیٰ کا کہنا تھا کہ اگر عوام اور قبائل متحد ہو جائیں تو صوبے میں پائیدار امن قائم کیا جا سکتا ہے۔
واضح رہے کہ حال ہی میں تربت میں نامعلوم افراد کی فائرنگ سے ایک خاتون سمیت 6 افراد جاں بحق ہوگئے تھے، جس کے بعد سکیورٹی صورتحال پر تشویش میں اضافہ ہوا ہے۔ وزیراعلیٰ نے اس عزم کا اظہار کیا کہ صوبے میں امن و امان ہر صورت یقینی بنایا جائے گا۔