اسلام آباد: آصف علی زرداری نے ہندو برادری کو ہولی کی مبارک باد دیتے ہوئے موجودہ حالات کے پیش نظر یہ تہوار سادگی سے منانے کی اپیل کی ہے۔
صدر مملکت نے مغربی سرحدی صورتحال کو مدنظر رکھتے ہوئے کہا کہ ہولی کی تقریبات محدود رکھی جائیں اور قومی یکجہتی و سکیورٹی تقاضوں کو پیشِ نظر رکھا جائے۔ انہوں نے عوامی اجتماعات اور بڑی تقریبات میں احتیاط برتنے کی بھی ہدایت کی۔
ان کا کہنا تھا کہ پاکستان اپنی مذہبی اور ثقافتی تنوع پر فخر کرتا ہے، تاہم موجودہ حالات میں اعتدال، بردباری اور قومی ہم آہنگی کو ترجیح دینا ضروری ہے، جبکہ ملک کی سلامتی سب سے اہم ہے۔
دوسری جانب پاکستان ہندو کونسل نے صدر کی اپیل کے بعد ہولی سادگی سے منانے کا اعلان کیا ہے۔ کونسل کے سرپرست ڈاکٹر رمیش کمار نے کہا کہ صدر کی درخواست کے احترام میں تہوار انتہائی سادہ انداز میں منایا جائے گا۔
