جنوبی بحرالکاہل کے خطے میں واقع جزیرہ نما ملک ٹونگا ایک شدید زلزلے کے جھٹکوں سے لرز اٹھا، جس کے باعث علاقے میں ہنگامی صورتحال پیدا ہو گئی اور شہریوں میں خوف و ہراس کی لہر دوڑ گئی۔
بین الاقوامی خبر رساں اداروں کے مطابق منگل کے روز آنے والے زلزلے کی شدت ریکٹر اسکیل پر 7.6 ریکارڈ کی گئی، جسے ایک نہایت طاقتور اور شدید زلزلہ تصور کیا جاتا ہے۔
امریکی جیولوجیکل سروے (USGS) کی جانب سے فراہم کردہ ابتدائی تفصیلات کے مطابق زلزلے کا مرکز نیافو شہر سے تقریباً 153 کلومیٹر مغرب میں زیرِ سمندر واقع تھا، جبکہ اس کی گہرائی 237.5 کلومیٹر ریکارڈ کی گئی، جو زلزلے کی نوعیت کو مزید پیچیدہ بناتی ہے۔
غیر ملکی میڈیا رپورٹس کے مطابق زلزلے کے جھٹکوں کے فوری بعد ٹونگا کے محکمہ موسمیات نے صورتحال کی سنگینی کو مدنظر رکھتے ہوئے ملک بھر میں ممکنہ سونامی کے خدشے کے تحت ہنگامی وارننگ جاری کر دی۔ سرکاری بیان میں شہریوں کو خبردار کیا گیا کہ کسی بھی ممکنہ خطرے کے پیش نظر وہ فوری طور پر بلند اور محفوظ مقامات کی جانب منتقل ہو جائیں۔
محکمہ موسمیات نے اپنے سوشل میڈیا پلیٹ فارم ایکس پر جاری پیغام میں واضح کیا کہ زلزلے کے بعد خطرناک سونامی کے چند ہی منٹوں میں جنم لینے کا خدشہ موجود ہے، جس کے باعث عوام کو مکمل احتیاط برتنے اور حکومتی ہدایات پر فوری عمل کرنے کی تاکید کی گئی۔
میڈیا رپورٹس کے مطابق زلزلے کے جھٹکوں کے بعد مختلف علاقوں میں لوگوں میں شدید خوف و ہراس پھیل گیا اور متعدد شہری گھبراہٹ کے عالم میں اپنے گھروں سے باہر نکل آئے۔
رپورٹ کے مطابق تاحال کسی جانی یا مالی نقصان کی تفصیلات سامنے نہیں آئیں، تاہم حکام صورتحال پر مسلسل نظر رکھے ہوئے ہیں اور امدادی و حفاظتی اقدامات کو فعال رکھا گیا ہے۔