اسلام آباد: پاکستانی پاسپورٹ کی عالمی درجہ بندی میں نمایاں بہتری سامنے آئی ہے اور یہ دنیا کے 101 بہترین پاسپورٹس کی فہرست میں شامل ہو گیا ہے۔
بین الاقوامی سطح پر ہونے والی اس پیش رفت کو ملک کی کامیاب خارجہ پالیسی اور سفارتی کوششوں کا نتیجہ قرار دیا جا رہا ہے۔
عالمی میڈیا اداروں نے اس تبدیلی کو پاکستان کی اہم سفارتی کامیابی قرار دیا ہے۔ ماہرین کا کہنا ہے کہ یہ درجہ بندی نہ صرف ملک کی بہتر ہوتی ہوئی ساکھ کی عکاس ہے بلکہ اس سے دنیا بھر میں پاکستانی شہریوں کے لیے سفری سہولیات میں بھی بہتری کے امکانات روشن ہوئے ہیں۔
واضح رہے کہ پاکستان نے گزشتہ کچھ عرصے کے دوران خطے میں کشیدگی کم کرنے اور مختلف ممالک کے درمیان ثالثی کا کردار ادا کرنے میں کلیدی پیش رفت کی ہے۔
ان کوششوں نے عالمی سطح پر پاکستان کے تشخص کو بہتر بنانے میں مدد فراہم کی ہے اور اسے امن پسند ملک کے طور پر اجاگر کیا ہے۔
سفارتی ماہرین کے مطابق پاکستان کی جانب سے مختلف ممالک کے درمیان پیغام رسانی کا ذریعہ بننا ایک بڑی کامیابی ہے۔ اس عمل سے نہ صرف عالمی تنازعات میں کمی آئی ہے بلکہ عالمی برادری میں پاکستان کی سیاسی اور سفارتی اہمیت بھی پہلے سے کہیں زیادہ بڑھ گئی ہے۔
ملک کی بڑھتی ہوئی یہ عالمی ساکھ معاشی اور سفارتی تعلقات کو فروغ دینے میں بھی معاون ثابت ہو سکتی ہے۔
پاسپورٹ کی رینکنگ میں بہتری پاکستان کی بہتر ہوتی ہوئی خارجہ پالیسیوں کا ثبوت ہے، جس سے آنے والے وقتوں میں بین الاقوامی برادری کے ساتھ پاکستان کے روابط مزید مستحکم اور نتیجہ خیز ثابت ہونے کی امید کی جا رہی ہے۔
یہ پیش رفت ایسے وقت میں ہوئی ہے جب پاکستان اپنی معاشی بحالی اور عالمی سطح پر تعلقات کو متوازن بنانے کے لیے کوشاں ہے۔
حکومت کی جانب سے کی جانے والی یہ سفارتی کوششیں رنگ لا رہی ہیں اور عالمی برادری میں پاکستان کے لیے ایک مثبت اور تعمیری تاثر ابھر کر سامنے آ رہا ہے جو کہ ملکی مفاد میں انتہائی اہم ہے۔