اسرائیلی فوج نے دعویٰ کیا ہے کہ شمالی غزہ میں حالیہ فضائی کارروائی کے دوران حماس کے فوجی سربراہ محمد عودہ کو نشانہ بنایا گیا ہے۔
بین الاقوامی خبر رساں اداروں کے مطابق حماس کی جانب سے اس اسرائیلی دعوے کی تاحال تصدیق یا تردید سامنے نہیں آئی ہے۔ دوسری جانب اسرائیلی میڈیا اور عسکری ذرائع اس کارروائی کا دعویٰ کررہے ہیں۔
اسرائیلی فوج نے اپنے جاری کردہ بیان میں کہا ہے کہ محمد عودہ کو ایک مخصوص کارروائی کے دوران نشانہ بنایا گیا۔ اسرائیلی حکام کے مطابق وہ حماس کے عسکری ونگ کی اہم قیادت میں شامل تھے اور شمالی غزہ میں تنظیمی سرگرمیوں کی نگرانی کر رہے تھے۔
دوسری جانب حماس نے اب تک اس دعوے پر کوئی باضابطہ ردعمل نہیں دیا، جس کے باعث صورتحال غیر یقینی کا شکار ہے۔ سیاسی و عسکری مبصرین کا کہنا ہے کہ اگر یہ دعویٰ درست ثابت ہوا تو صورت حال مزید کشیدہ ہونے کی طرف جا سکتی ہے۔
واضح رہے کہ محمد عودہ کو رواں برس مئی میں القسام بریگیڈز کی قیادت سونپی گئی تھی۔ انہوں نے سابق کمانڈر عزالدین الحداد کی جگہ ذمہ داریاں سنبھالی تھیں جو ایک اسرائیلی حملے میں شہید ہوگئے تھے۔
اسرائیلی فوج کا مؤقف ہے کہ وہ غزہ میں حماس کی عسکری قیادت کو مسلسل نشانہ بنا رہی ہے تاکہ تنظیم کی جنگی صلاحیت کو کمزور کیا جا سکے۔
اُدھر غزہ میں جاری جنگ کے باعث انسانی بحران مزید سنگین ہوتا جا رہا ہے۔ اقوام متحدہ اور عالمی امدادی ادارے مسلسل خبردار کر رہے ہیں کہ غزہ میں شہری آبادی شدید غذائی قلت، طبی بحران اور بنیادی سہولتوں کی کمی کا سامنا کر رہی ہے۔
تجزیہ کاروں کے مطابق جنگ بندی کی متعدد کوششوں کے باوجود اسرائیل اور حماس کے درمیان کشیدگی کم ہوتی نظر نہیں آ رہی۔
