لاہور(نمائندہ جسارت) سابق وزیراعظم نواز شریف کی صحت سے متعلق رپورٹ لاہورہائیکورٹ میں جمع کرادی گئی جس کے مطابق ان کی طبیعت بدستور خراب ہے۔ نوازشریف کے وکیل امجد پرویز نے ان کی صحت سے متعلق رپورٹ ڈپٹی رجسٹرارجوڈیشل کوجمع کرائی۔ رپورٹ کے مطابق نوازشریف کی صحت ٹھیک نہیں ہے، ان کے پلیٹ لیٹس کومستحکم کرنے کے لیے علاج جاری ہے، انہیں 50 ہزارسے ڈیڑھ لاکھ تک پلیٹ لیٹس چاہییں۔رپورٹ میں مزید کہا گیا کہ بائی پاس آپریشن کے بعد نوازشریف کی طبیعت کچھ بہترہے مگران کی خون کی شریانوں میں مسائل ہیں، نوازشریف کے دل کی ایم آر آئی بھی ہورہی ہے اور مرض کے مکمل تشخیص کا عمل بھی جاری ہے۔
