لاہور(نمائندہ جسارت)ن لیگی صدر اور قومی اسمبلی میں قائد حزب اختلاف شہباز شریف نے کہا ہے کہ پنجاب میں بلدیاتی اداروں کی بحالی ناگزیر ہے، شہباز شریف نے کہا کہ نچلی سطح پر عوام کو با اختیار بنانا ہوگا، بلدیاتی اداروں کے نہ ہونے سے عوام کو بہت نقصان ہوا ہے۔ان خیالات کا اظہار انہوں نے ایک بیان میں کیا۔ان کا کہنا تھا کہ جو بلدیاتی اداروں کی بحالی پر ڈٹے رہے وہ خراجِ تحسین کے مستحق ہیں۔دوسری جانب ن لیگی ترجمان مریم اورنگزیب کا کہنا ہے کہ پی ڈی ایم آج بھی مہنگائی کے خلاف احتجاجی مظاہرے کرے گی اورکل فیصل آباد، گوجرانوالہ، ملتان،
بھکر، میانوالی، ساہیوال، نواب شاہ، دادو، ٹھٹھہ، سجاول، مٹھی اور میاں چنوں میں مظاہرے ہوں گے۔
