کراچی(اسٹاف رپورٹر) جامعۃ الامام نعمان بن ثابتؒ اور جماعت اسلامی علاقہ دستگیر کے تحت رضوان پارک فیڈرل بی ایریا بلاک 14 میں عالمی محفل حسن قرأت کا انعقاد کیا گیا۔تقریب میں جماعت اسلامی کراچی کے امیرحافظ نعیم الرحمن اور ضلع گلبرگ وسطی کے امیرفاروق نعمت اللہ نے خصوصی شرکت کی جبکہ تقریب کے میزبان مدیر جامعۃ الامام نعمان بن ثابت مولاناحبیب احمد حنفی اور ناظم اعلیٰ جمعیت اتحاد العلما کراچی مولانا عبدالوحید نے بھی خصوصی خطاب کیا۔محفل میں بین الاقوامی شہرت یافتہ قرأ کے ساتھ ساتھ پاکستان کے مایہ ناز قرأ نے بھی شرکت
کی۔ ان کے علاوہ مشہور نعت خوانوں نے ہدیہ نعت پیش کیا۔ محفل میں بین الاقوامی قرأ قاری عیدی شعبان نے تنزانیہ افریقہ اور قاری عبدالرحمن الخولی نے مصر سے خصوصی شرکت کی جبکہ پاکستان کے مایہ ناز قرأ قاری مفتی شہاب الدین، قاری مدثر احسن منصوری، قاری نصیر حسین شاہ، قاری فہد الرحمن نے تلاوت فرمائی۔ اس موقع پر معروف نعت خواں جناب نعمان شاہ بخاری، مفتی سلمان عباسی، فرحان الرشید نے ہدیہ نعت پیش کیا۔ تقریب میں مردوں سمیت خواتین نے بھی بڑی تعداد میں شریک ہوکر قرآن سے گہرے لگاؤکا ثبوت دیا ۔ حافظ نعیم الرحمن نے اپنے خطاب میں کہا کہ جماعت اسلامی قرآن کا نظام چاہتی ہے۔ اور اسی کے لیے جدوجہد کررہی ہے۔ انہوں نے مولانا حبیب حنفی کو کامیاب پروگرام کے انعقاد پر مبارکباد بھی پیش کی۔ فاروق نعمت اللہ نے مہمانوں کا شکریہ ادا کیا۔ مولانا حبیب احمد حنفی نے تمام شرکا کا شکریہ ادا کرتے ہوئے آئندہ اس طرح کی محفل منعقد کرنے کی خوش خبری سنائی جبکہ مولانا عبدالوحید نے پروگرام کے منتظمین کو مبارکباد پیش کی۔
