مقبوضہ بیت المقدس (انٹرنیشنل ڈیسک) اسرائیل اور مراکش کے درمیان مطلوب افراد کی حوالگی کا معاہدہ طے پاگیا۔ اسرائیلی میڈیا کے مطابق اسرائیلی پولیس کے سربراہ اور مراکشی ہم منصب کے ساتھ ملاقات میں اس سمجھوتے پر دستخط کیے گئے ہیں۔ عبرانی چینل 13 نے رپورٹ کیا کہ اس معاہدے کے نتیجے میں آنے والے دنوں میں اس تعاون سے متعلق ہر چیز میں ڈرامائی پیش رفت دیکھنے کو ملے گی اور دنیا اسرائیل کو مطلوب مجرموں اور تحقیقات کے لیے مطلوب افراد کو اسرائیل میں اترتے دیکھے گی۔ تجزیہ کاروںکا کہنا ہے کہ رباط حکومت تل ابیب سے تعلقات کی مخالفت کو کچلنے کی کوشش کررہی ہے اور حالیہ معاہدہ اس کا واضح ثبوت ہے۔ یاد رہے کہ 13 مارچ کو رائل ائر ماروک نے کاسا بلانکا اور تل ابیب کو ملانے والی اپنی باقاعدہ لائن کی پہلی براہ راست پرواز شروع کی تھی۔ دسمبر 2020 ء میں اسرائیل اور مراکش نے 2000 ء سے معطل تعلقات بحال کرنے کا اعلان کیاتھا۔
