لاہور (سید وزیر علی قادری)پاکستان اور آسٹریلیا کی کرکٹ ٹیموں کے درمیان3 ون ڈے انٹرنیشنل میچوں پر مشتمل سیریز کا فیصلہ کن میچ آج قذافی اسٹیڈیم لاہور میں کھیلا جائے گا۔ میچ ڈے، نائٹ ہو گا اور پاکستانی وقت کے مطابق دن 3 بجے شروع ہو گا۔ دونوں ٹیموں کے درمیان تین میچوں کی سیریز 1-1سے برابر ہے۔ کینگروز نے پہلے میچ میں گرین شرٹس کو 88رنز سے شکست دی تھی ، پاکستان ٹیم نے دوسرے میچ میں حساب برابر کرتے ہوئے آسٹریلوی ٹیم کو 6 وکٹوں سے ہرا دیا۔ دونوں ٹیموں کے درمیان فیصلہ کن میچ آج کھیلا جائے گا۔ دونوں ٹیموں کے کپتانوں نے کامیابی کے لئے بیانات دیے ہیں اور تیسرے اور آخری میچ میں کانٹے دار مقابلے کی توقع کی جارہی ہے۔ قومی ٹیم مایہ ناز بیٹر بابر اعظم کی زیرقیادت میدان میں اترے گی جبکہ آسٹریلوی ٹیم کو ایرن فنچ لیڈ کریں گے۔ دونوں ٹیموں کے درمیان سیریز میں شامل واحد ٹی 20 انٹرنیشنل میچ 5اپریل کو کھیلا جائے گا۔ تمام میچز قذافی اسٹیڈیم لاہور میں کھیلے جائیں گے۔دوسری طرف میچ سے قبل دونوں ٹیموں کے کھلاڑیوں نے قذافی اسٹیڈیم میں بھرپور پریکٹس کرکے خامیوں پر قابو پایا۔ اس موقع پر بولنگ، بیٹنگ اور فیلڈنگ کوچز بھی کھلاڑیوں کو مفید مشوروں سے نوازتے رہے۔
